[N]. "مردم تالش- "دعوت برای شناخت شخص عیسی".mp4

[N]. Talysh People- "Invitation to Know Jesus Personally".mp4 //Pauli bə Korinfıjon İminə Nomə - 15 1 Esət, ha imoniyə boon, piyeydəme çımı bəyon kardə iyən şımə ğəbul kardə, boşmə ğoymə pobasti bıə Şoyə Xəbə bəşmə yod dənəm. 2 Qirəm şımə çımı bəyon kardə sıxani ğoym bıqətoşon, de həmonə Şoyə Xəbən xılos bəbeşon, neysə şımə hədərə imon vardəyone. 3 Az rosnime bəşmə çımı ıştənən ğəbul kardə ən vocibə təlimi ki, bə Mığəddəsə Nıvıştəyon mıvofiğ Məsih bəçəmə qınonro marde, 4 bə Mığəddəsə Nıvıştəyon mıvofiğ dəkandə be iyən seminə ruji bəyji be. 5 Əv sıftə bə Kefa, çəyo bə Donzə şoqirdi çiyəy. 6 Çımi bəpeşt əv bə penc sasə vey imoniyə boə eyni vaxtədə çiyəy. Çəvonədə kali kəson esətən jiyeydən, kali kəson mardən. 7 Çəyo Məsih bə Yağubi iyən bə həmə həvariyon çiyəy. 8 Ən oxoədə isə bevaxt moəku bıə əğıli ğəzinə bıə bəmınən çiyəy. 9 Çumçıko az həvariyon ən rukə qıləm iyən Xıdo icmon rımuz kardeyro bə həvari nomi loyiğ nim. 10 Əmma de Xıdo lutfi harçi bıbomən, jıqom. Çəy bəmı bıə lutf hədərə nıbe, çumçıko həmməysə vey zəhmət kəşəme. Sıxani rosti, az ne, demı bıə Xıdo lutfi zəhmət kəşəşe. 11 De jıqoy həm az, həmən əvon ımi vəz kardeydəmon, şımənən bımi imon vardəyone.