5 Xaneiro, Actualidade Mediodía

No informativo de hoxe abrimos cunha noticia de alcance internacional: Estados Unidos inicia o ano cunha operación militar en Venezuela que remata coa captura de Nicolás Maduro. Un acontecemento histórico que se segue con especial atención na Estrada, onde a comunidade venezolana —arredor de 300 persoas— vive con preocupación este momento decisivo. Escoitamos os testemuños de Luis Leal, veciño de Tabeirós e residente en Venezuela, e de José Enrique Nogueira, presidente da Hermandad de Venezolanos na Estrada. Na actualidade local, derrúbase a estrutura da pérgola da praza do mercado, e o Concello estuda aproveitar esta situación para acometer unha reforma integral se se logra a financiación necesaria. A xornada tamén está marcada pola chegada das Súas Maxestades os Reis Magos de Oriente á Estrada. A cabalgata sairá aínda que chova —sempre que non sexa unha precipitación intensa— e a recepción trasladarase ao Teatro Principal. Todo está listo no dispositivo de seguridade, e a Policía Local agradece o comportamento exemplar da veciñanza durante unhas festas sen incidencias destacables. Ademais, esta noite celébrase a Festa da Hostalaría Estradense, cun sorteo que inclúe unha viaxe entre numerosos agasallos. Na comarca, a Garda Civil detén en O Porriño un home de 50 anos por un grave caso de violencia de xénero, cunha muller ferida de extrema gravidade. En deportes, destacamos o triunfo de Brais Rey, que se proclama campión de Galicia de Campo a Través 2025 na categoría sub16, completando os 4.000 metros cunha actuación brillante.